ГҮЙЛТЭЭР ЭХЛЭН ХИЧЭЭЛЛЭГСДЭД ӨГӨХ 10 ЗӨВЛӨГӨӨ

Харин гүйлт бол зуны улиралд богино өмд, цамц, гутал байхад л болоо. Гүйх газраа өөрсдөө сонгоход фитнессийн сар бүрийн төлбөр шиг зардал гарахгүй юм чинь…

Харин гүйлтийн гутлаа маш зөв сонгохыг зөвлөж байна. Мөн биеийн болон сэтгэлзүйн бэлтгэл чухал гэдгийг онцолж байна. Ингээд Таны шинэ хобби болох гүйлтээр эхлэн хичээллэхэд зориулж хэдэн зөвлөгөө өгье.

НЭГ. Гүйлтийн спортын зориулалтын гутал худалдан авах. Сайн чанарын гутал нэлээд үнэтэй 200,000 орчим төгрөг байдаг.

ХОЁР. Тохиромжтой өмд, цамц, оймс бэлтгэх. 100% цэвэр даавуун хувцас сонгож болохгүй. Хөлс нэвтрүүлдэг, синтетик болон байгалийн хосолмол материалыг сонгох нь зүйтэй.

ГУРАВ. Баг үүсгэвэл сайн. Багаар гүйх нь бие биенээ урамшуулах, хөгжөөх, сэргээхээс гадна цуг гүйдэг найз нөхөдтэй болгоно.

ДӨРӨВ. Төлөвлөгөө гаргах. Энэ тал дээр мэргэжлийн зөвлөгөө авч болно. Хамгийн тохиромжтой хувилбар бол “гүйх-алхах арга” юм. Жишээ нь, 1 минут гүйгээд 5 минут алхах. Үүнийг 30 минутын турш 5 удаа давтана. Цаашид 7 хоног бүр гүйх хугацааг уртасгаж, алхах хугацааг багасгасаар 11 долоо хоногийн дараа тасралтгүй 30 минут гүйдэг болно.

ТАВ. Шинэ хэвшилд дасал болох. Биеийн тамир, спорт л болсон хойно хүнд хэцүү, шантрах, залхуурах үе тохиолдоно. Хэзээ ч бууж өгч болохгүй! Нэлээн ядарсны дараа “Ер нь би юуны төлөө гүйж байгаа юм. Больё” гэж бодогдох үе ирэхэд сэтгэл зүйн бэлтгэлтэй байх хэрэгтэй. Шинэ хэвшилд дасахад 4-6 долоо хоног (30-45 өдөр) шаардагдана. Энэ хооронд бууж өгч болохгүй. Мөн түүнчлэн бага багаар ахиулахыг мөрдлөг болгох хэрэгтэй. Ихэнх хүмүүс хэт ширүүн гүйснээс болж, булчин шөрмөсөө гэмтээх, цочроодог. Аажим, бага багаар ахиулах аргаар үзэх нь зүйтэй.

ЗУРГАА. Эрч хүчээ авсан байх шаардлагатай. Гүйхийн өмнөх хооллолтонд хугацаа хамгийн чухал. Гүйхээс цаг хагасын өмнө 200-400 калори илчлэг, мөн бага зэрэг уураг авсан байвал сайн. Энэ хугацаанд бие хоолыг боловсруулж, таны гүйхэд зориулагдах эрчим хүчийг цуглуулсан байх болно. Огт идэхгүй байх, эсвэл хэтрүүлэн идэх нь булчинд ядралт өгдөг, мөн ходоод өвдөх эрсдэлтэй. Гүйснээс 30-45 минутын дараа идэх нь сэргэлтэнд хамгийн тохиромжтой.

FullSizeRender

ДОЛОО. Шингэнээ сайн авсан байх. Гүйхээс 2 цагийн өмнө 600гр ус ууна. Гүйж байх үедээ ус уухад асуудалгүй. Зориулалтын спортын ундаа нь чухал электролит болон натри, кали, кальци, магни зэрэг эрдэс бодисыг нөхөх үйлчилгээтэй байдаг. Харамсалтай нь манай дэлгүүрүүдэд харагдахгүй байгаа юм.

НАЙМ. Бие халаалт хийх. Булчингаа сунгах замаар биеэ халаах хэрэгтэй. 5 минут алхах нь мөн сайн бие халаалт болдог. Бие халаалт нь гүйлтийн турш булчингийн уян хатан байдалд тун хэрэгтэй.

ЕС. Биеэ чагнаж байх хэрэгтэй. Ямар нэгэн өвдөлт мэдэрвэл гүйлтээ зогсоох шаардлагатай. Өвдсөн газар мөс тавьж амраах замаар эмчлэх рүү орсон нь дээр. Өвдөхгүй болсны дараа гүйлтээ үргэлжлүүлж болно.

FullSizeRender 2

АРАВ. Амрах хэрэгтэй. Амарснаар биед сэргэх процесс явагдана. Гүйлт болон ямар нэгэн биеийн тамирын үр дүнд булчинд тодорхой хэмжээний урагдалт үүсдэг. Таны бие организм энэ урагдалтыг эдгээхийн тулд ажиллаж эхлэх ба үр дүнд нь шинээр булчин үүсч, бие организм хүчирхэг болох үйл явагдана. Хэрэв зөв бөгөөд хангалттай амарч чадахгүй бол дараагийн гүйлтийн үед өвдөлт мэдрэгдэх, ядрах эсвэл идэвхгүй байдалд ордог. Нэгэнт та гүйхээр шийдсэн бол гүйлтийн хооронд дор хаяж нэг өдөр амрах хэрэгтэй.

Гүйлттэй холбоотой тогтмол мэдээллийг https://www.facebook.com/mongolrunning/ хуудаснаас авч байгаарай!